Rom 3 | BNP | STEP | Pali a viri tara bara i nana maea, ‘Ra naro ni pala a kuli, i uka ma i ratea a Vure ge ngaru a viri. Pali a ra maki i kamumu vona ni gi gale hita e huriki a Iuda?’

a 3:4 Sng 51:4

b 3:9 Rom 1:18–2:24; 3:23

c 3:10-12 Sng 14:1-3; 53:1-3

d 3:13 Sng 5:9; 140:3

e 3:14 Sng 10:7

f 3:15-17 Ais 59:7-8

g 3:18 Sng 36:1

h 3:20 Sng 143:2; Rom 7:7; Gal 2:16

i 3:22 Gal 2:16

j 3:24 Rom 5:1

k 3:29 Rom 10:12

l 3:30 Vin 6:4; Gal 3:20

m 3:31 Mat 5:17

Romans 3

A Narona Vure i Kiripiripi

1 Pali a viri tara bara i nana maea, ‘Ra naro ni pala a kuli, i uka ma i ratea a Vure ge ngaru a viri. Pali a ra maki i kamumu vona ni gi gale hita e huriki a Iuda?’ 2 Iau bara koli maea, ‘Ra hini hita a Iuda vona, i tahoka a maki kamumu vona i kupo. A maki tara i kamumu vona, a Vure i habi ne huriki a gare ne hita a Hinere vona.’ 3 I muholi, e huriki a gare ne hita hosi, e huriki ranga i uka ma ri longo mai a nitana Vure. I mavonga, ge navai? A Vure tara, i uka ma ge ramai a nitana? 4 ^aBara i ramai a nitana! E huriki lobo bara ri tatami, pali a Vure kikeri a Viri ni ta muholi.

I manga a ngava ni here hosi, i maea,

“E huriki lobo ri gi matakilaka vona i muholi a ngava o padi virihi e huriki vona.
Pali e huriki ri padi virihi ioe na ngava, ri gi velu.”
5 Hita e huriki a bakovi hale, pali a naro hale ne hita i vakasiri kavakava a Vure i malamala. Pali si gi ta navai? Si gi taki a Vure i uka ma i ramai a naro kamumu na tahuna i habi a nimadihi ne hita na naro hale ne hita? Ngane a ta manga a bakovi tavula kunana. 6 Nahea si gi ta maea! Ge mavonga, ge pelekado navai e huriki lobo na malala?

7 Pali a viri tara bara i koke, i ta maea, “Na tahuna iau a tatami, e huriki ri matakilalea a Vure a Viri ni ta muholi, lakea ri kavurikea. I mavonga, a Vure, i navai ge taki iau a bakovi hale? 8 O Paulus, a ngavamu ge muholi, i kamumu si gi rata a naro hale, lakea e huriki bara ri kavurikea a Vure!”

E huriki ranga ri ratea a ngava hale iea, ri padi virihi tavula iau, ta a ratea a ngava iea. I kamumu a Vure ge habi a nimadihi ne ria vona a naro hale iea ri ratea.

I Uka Tara Bakovi Ge Malamala

9 ^bPali hita e huriki a Iuda, si rangi e huriki ranga, o i uka? I uka liu! A ngava si ratea pali i maea, e huriki a Iuda ri manga kunana e huriki i uka ma ria a Iuda. Hita lobo si rata pali a naro hale, lakea a Vure ge pelekado hita. 10 ^cA ngava ni here puru na Hinere i ta maea,

“I uka tara viri i malamala na matana Vure. I uka liu.
11 I uka tara viri ge longokilalea a Nitana Vure.
I uka tara viri ge toni ni laho turana Vure.
12 E huriki lobo ri ngalahere na Vure. Ria lobo a bakovi tavula na matana.
I uka tara viri ge rata a naro kamumu.
I uka liu.”
13 ^d“Na ngavane ria, ri bimate e huriki.
A tabelene ria, ri tatami kunana.”
“A nitane ria i ratapile e huriki, i manga a mata hale i kara mate a viri.”
14 ^e“Ri ruduraha, ri biu kato vakaroro e huriki.”
15 ^f“Ri kapi kunana ri gi rabalaki a viri.
16 Na tabeke lobo ri lakea vona ri ratapile, ri vakamadihi e huriki.
17 Ri keri ni made na nivalemu.”
18 ^g“I uka ma ri mangenge na Vure.”
19 Si lohoka vona, a Vinara ne Moses ni here virihi mae e huriki a Iuda, re huriki a vinara i matakari ria. I mavonga, e huriki lobo na malala bara ri keri ni koli a ngava. E huriki lobo bara ri tahoka a ngava na matana Vure; e huriki a Iuda, e huriki i uka ma ria a Iuda. 20 ^hI uka tara viri ge ramai a vinara lobo, lakea a Vure ge takia, ta ia a bakovi malamala. A leho na vinara, i rata hita si gi matakilaka vona a naro hale ne hita.

A Viri i Luhoi Torea a Vure i Malamala

21 Ngane i bele kavakava a dala a Vure i ravunu vuroki a naro hale ne hita. I uka ma i bele na ni longototo a Vinara. I bele na dala tara. A dala iea, a Vure i vakalongo muga vona hosi na Hinere i maea, 22 ⁱa Vure ge ravunu vuroki a naro hale ne huriki lobo ri luhoi torea e Isu Kristo, a vuhuna e huriki lobo ri palupulupu na matana; e huriki a Iuda, e huriki i uka ma ria a Iuda. 23 Hita lobo si rata pali a naro hale, si marava basi na bagetuanga na Vure. 24 ^jPali a Vure i rata kamumu hita, i taki hita si malamala. I uka ma si ratea tara maki a Vure ge vivi ne hita, ge konamule hita. I rata tavula kunana. E Isu Kristo i ratea a dala iea na nimatena. 25 A Vure i rudua ge mate, ge bole a murine hita, ge vakalobo a rongova na Vure, lakea a Vure ge puga vuroki a naro hale ne huriki ri luhoi tora ia. I rata mavonga si gi matakilaka vona a narona i malamala, a vuhuna hosi i hatenono ne huriki a bakovi hale, i uka ma i habi a nimadihi malaviriri ne ria. 26 I rata mavonga, na tahuna mona si gi matakilaka vona, ia i malamala. A Vure i rata e huriki lobo ri luhoi torea e Isu ri gi malamala.

27 I mavonga, i uka tara viri ge bibi rike mulea, a vuhuna si lohoka vona i uka tara viri ge longototo lobo a Vinara, lakea a Vure ge ravunu vuroki a naro hale vona. A Vure i ravunu vuroki a naro hale ne huriki ri luhoi torea e Isu.

29 ^kA Vure i uka ma a Vure ne huriki a Iuda kunana. E huriki i uka ma ria a Iuda, ria ranga, ia a Vure ne ria, 30 ^la vuhuna a Vure i taku kunana. Ge ravunu vuroki a naro hale ne huriki a Iuda ri luhoi torea e Kristo. I mavonga, ge ravunu vuroki a naro hale ne huriki i uka ma ria a Iuda na tahuna ri luhoi torea e Kristo. 31 ^mI mavonga, i uka ma i ratea a Vinara ne Moses ge uka leho na tahuna a Vure i ravunu vuroki a naro hale na viri i luhoi torea e Kristo. Na tahuna si luhoi torea e Kristo, si vakatora a Vinara ne Moses.